من اجل جيل جديد و مشروع وطني افقي جماعي

تاريخ النشر : 2021-03-16 - 12:19:16
60 : عدد المشاهدين

كتب الاعلامي بوبكر بن عكاشة

 

يزينا ..تعبنا … تحبوش نتبدلوا بكلنا ؟ ما تعبتوش ؟ ما أيستوش منهم ؟ و ما تخافوش على بلادكم وأولادكم ؟ مازلتوا ما فهمتوش اللي يخدموا بينا باش يوصلوا للسلطة بالكذب و دون برامج و بخطاب الايديولوجيا و التخوين ووالتخويف ؟ ما فهمتوش لتوة اللي معاركهم ميش تحسنلنا في وضعنا بل تزيد في تدميرنا ؟ .. اللي خايف على الاسلام ..ما تخافش و خاف ربي و الاحزاب راهي لا تدافع عن حقك في التدين بل تستعمل في عاطفتك الدينية . اللي خايف على الوطن من التطرف ..ما تخافش من الاسلام و المتدين … أما خاف ملي يستغل في خوفك باش يوصل للسلطة باستعمال مخاوفك .

اللي خايف من الدول الامبريالية و المانحين اللي طامعة في ثرواتتا و شركاتنا ..ما تخافش ..خاف ملي يكذب عليك و يستغل في خوفك باش تعطيه صوتك … اللي خايف على بلاده و يحب تونس ترجع خير ملي كانت مع الحفاظ على الحريات و تحرير المبادرة و الغاء الرخص و تطوير الادارة و تحسين الخدمات و البحث على أسواق جديدة و تثمين منتوجنا و الاستثمار في البحث العلمي و التكنولوجيا و تحسين جودة التعليم و الحلم بتونس ناجحة و منظمة و تطبق القانون و تحارب الفساد و الاحتكار و تدافع على تساوي الفرص بين مواطنيها و تبتكر و تبدع و تنجح و تنتج و تخدم على اهداف وطنية مشتركة و مدمجة لكل شرائح المجتمع و كل الجهات . تونس اللي كل واحد عندو حلمة ينجم يوصل يحققها في مناخ حر و يلقى التمويل و التوانسة ووالاجانب يعطيو فيه ثقة خاطر بلاده محل ثقة و ميش مهددة بالافلاس .

هاذم شوية شروط بسيطة تتطلب شعب ، نحن جميعا، أي بكلنا ، باختلافاتنا ، ينجم يجمعنا مشروع واحد : إعادة بناء الثقة باختلافاتنا ..خاطر ماناش مختلفين ..و مع بعضنا انجمو بكلنا نقرروا مصيرنا مع بعضنا .. انجمو اليوم نقرروا كشعب واعي و مسؤول أنو ندفعو و نشاركو في مشروع سياسي وطني أفقي لا يقصي أحدا و عندو هدف واحد: نحافظوا على المكاسب اللي حققناها و ما عادش تتمس لا بالزيادة و لا بالنقصان بناء على الدستور .

و نبداو في تغيير الامور بيدينا . الناس المصطفة تراجع رواحها و الناس الساكتة تعبر و تنخرط و الناس المتحزبة بصفة عمياء تقرر و تقتنع ان الثنية غالطة والحروب اللي تخوض فيها و تعارك عليها هي مجرد أوهام و ما عندهاش معنى دون دولة قوية اقتصاديا و ماليا وثقافيا وفي كل مجال . الدولة اللي تحمي كل معتقد .

الدولة اللي تحترم فيها القوانين . جيل جديد و بقيم أساسها الوطن و العمل و الثقة و الانضباط والصدق . نحن شعب متجانس و الفوارق اللي بيناتنا ما تنجم كان تجمعنا و تقوينا و ما تفرقناش . تونس تنجم تمنع اليوم بينا الكل ..اليد في اليد باش نوصلو لهذا ..أنا عندي ثقة في التوانسة ..

يزينا ..تعبنا

 

 

 

Partagez Maintenant !
TwitterGoogle+Linkedin